Taliwala sa hulga ni Bagyong Ineng, wala gyuy makapugong sa among kagustuhan nga madayun ang gikatakdang pagbiyahe sa Ilo-ilo kauban ang akong mga higala. Bisan aduna’y kabalaka sa mga posibleng mahitabo, hingpit nga pag-ampo lamang sa Kahitas-an ang among bawun. Sa tinud-anay lang, dili gyud mi andam sa among pagbiyahe, financially, physically ug mentally, tungod sa among managlahing schedules ug priorities. Apan tungud kay mas nipatigbabaw ang pag-ampo nga mamahimong malampusun ang among pagbiyahe, nisugal mi bisan sa kabalaka nga amo gibati.
Alas 10 palang sa gabii, nisakay nami ug bus paingun sa Escalante. Tungud kay tight man ang among budget, mas gipili namo nga mag trucking nalang. Dili namo ikalimud nga nahadluk gyud mi kay naa pa si Bagyong Ineng sa PAR ug expected gyud nga dagku ang bawud tungud kay nagpadayun gayud nga nasinati sa tibuuk nasud ang Habagat. Tuud man, niabut mi sa Tabuelan nga nasinati ang kusug nga paghuros sa hangin. Niadtong tungura, kahibaw nako sa akong kaugalingon nga nerbiyoson gyud ku sa duha ka oras nga biyahe sa RORO paingun sa Escalante. Gilingaw lang nako ang akong kaugalingon pinaagi sa pagpaminaw ug music ug pagduwa ug Block Tetris sa akong cellphone. Sa dihang hapit na mi mudunggo sa Barcelona Port sa Escalante, mas nikusog pa ug kuso-kuso ang bawud ug mabati gyud nimo ang pagsayaw-sayaw sa barko. Alas 3:30 sa kadlawun, luwasnung niduggo ang among gisakyan nga barko sa Barcelona Port ug nilanat ug dul-an upat ka oras ang among pagbiyahe gikan sa Lungsod sa Escalante paingun sa Bacolod. Tungud kay aduna man mi gi-apas nga itinerary, wala nami namahaw ug ni diritso nami ug sakay ug fastcraft paingun sa Ilo-Ilo. Tu-ud man, nakaabot pa mi sa ala 6:30 nga biyahe sa Weesam Express, apan wala nako damha nga mas doble pa akong mabati nga kakuyaw sa dihang nibiya na ang among gisakyan sa pantalan. Lahi gyud diay ang experience kung magsakay ka ug fastcraft, hilabi na kung naa ka sa lower deck nga bahin kay mabati ngyud nimo ang kusog nga paghampak sa bawud ug gani, mulapas pa sa bintana sa among gisakyan nga fastcraft ang mga bawud. Tingali kay sa sobra nako nga kulba, giingnan ko sa akong usa ka higala nga normal ra ang ingun-ani nga sitwasyon tungud kay naglain man gihapon ang panahon. Sa tinud-anay lang, pikas na bahin sa akong huna-huna, nagbasol ko kun nganong among gipugos ug biyahe bisan ngil-ad pa gihapon ang lakat sa panahon. Nikusog ug huros ang hangin ug ni-unos tunga-tunga sa lawud apan siguro gisukod lang gyud sa Ginoo ang among pagtuo. Alas 8 sa buntag, nidunggo mi sa pantalan sa Ilo-ilo. Bisan paman wala mi tulog, taliwala sa nag-uwang siyudad sa Ilo-Ilo, gipadayun gihapon namo ang among itinerary. Salamat sa akong usa ka higala nga kanunay mag han-ay sa among lakaw. Sukad sa among pagbiya sa North Bus Terminal hangtud sa among pag-abut dinhi sa Ilo-Ilo, wala pagyud nasudli among tiyan. Una namong giadto ang Netong’s Original La Paz Batchoy sa La Paz Market. Nisuway usab mi sa lamiang purong kape sa labing sikat nga Café sa tibuuk Ilo-Ilo nga mao ang Madge Café. Nag-uwan gihapon sa tibu-uk Ilo-Ilo apan gipadayun gihapon namo ang Day Tour. Tungud kay dili man namo pamilyar ang mga lugar nga among adtuan, nagpangutana mi sa mga tawo nga among nasugatan. Na-adtuan namo ang Museo Ilo-Ilo, Balay Panlalawigan sa Ilo-ilo, ang labing kara-an nga Molo Church ug ang Molo Mansion nga nahimutang atbang lamang sa Molo Plaza. Human sa Molo Mansion, nibiyahe mi ug mukabat sa duha ka oras paingun sa Garin Farm nga maoy highlight sa among Day 1 Tour sa Ilo-Ilo. Sa imong P150, imong masinati ang fish calling and feeding, dove calling and feeding, goat calling and feeding ug uban pang water activities sama sa kayaking ug extreme activities sama sa zip line. Ug ang pinakahinaman namo sa tanan, ang makasaka sa ilang pilgrimage ug masinati ang feeling na nahilangit na ang imong kalag.
Ngitngit na nga nibiya mi sa Garin Farm, pasado alas 8 sa gabii nami naabot sa siyudad ug nihapit una mi sa sikat nga suruyanan sa Ilo-Ilo nga mao ang Esplanade River. Pagkahuman namo ug subay sa river banks ni-ini, nihapit mi sa duol nga 7 eleven para manihapon. Alas 4 palang sa kadlawun, nibiya nami paingun sa bus terminal sa Jaro. Gikan sa terminal mukabat sa upat ka oras ang biyahe paingun sa Amihanang bahin sa Ilo-Ilo diin malabyan ang mga Lungsod sa Barotac Viejo, San Rafael, Ajuy, Concepcion, Sara, Lemery, San Dionisio, Batad, Estancia, Balasan ug Carles. Pipila ka gutlo sa call time nga gihatag sa among Travel agency nga Las Islas Travel and Tours, gitigum na mi sa nakatagana namo nga tour guide nga si Joel, kinsa among nasayran nga lumad nga taga Lungsod sa Balamban apan dul-an sa duha ka dekada na nga nagpuyo sa Ilo-ilo. Sa P999, guaranteed na ang imong Island hopping Day tour sa unom ka Isla ug islets sa Islas de Gigantes ug free plated lunch. Luwan sa motorbanca nga Inday Nanet, ang naglangkub sa among grupo sa joiners mao ang 8 ka mga mag-officemates gikan sa Iligan City, manag-uyab gikan sa Cagayan De Oro ug kaming tulo nga gikan sa Cebu City. As expected, dali ra kayo nagka sinabtanay ang among grupo tungud kay mga Bisaya man unya dali ra sad sila ikasinabot.
Unang Isla namo nga gi-adtuan mao ang Ojastras Island nga nahimutang sa Gigante Sur, ang nabantug nga kanhi pahuwayanan sa mga mangingisda sa maong dapit. Ikaduhang isla mao ang Antonia Point, nga nahimutang sa Barangay Gabi, Gigante Sur, ang labing inila sa mga turista tungod sa maanindot nga beachfront niini. Sa Ikatulong isla, nipahibawo ang among tour guide nga si Joel nga sa Bantigue Island una mi mamahuway samtang naghuwat nga idalit ang among paniudto. Nisilong una mi sa kan-anan sa Bantigue Sandbar ug mikuha usa mi ug pipila ka litrato sa maong dapit. Tu-ud man, gidalit na ni Joel ang among paniudto nga usa ka tray sa steamed Wasay-wasay kun scallops, pinirito nga bangus ug adobo nga manok. Human sa paniudto, nibiya na mi sa Bantigue Island ug nibiyahe na paingun sa pinakasikat nga isla nga mao ang Cabugao Gamay nga nahimutang gihapon sa Gigante Sur. Ang Cabugao Gamay ang giila nga labing “photographed” nga isla sa tibuok lalawigan. Human sa among pagsaka sa mga pang-pang sa Cabugay Gamay, mipahibawo ang among guide nga mamauli na kami tungod kay delikado kung maabtan ug unos samtang naglawig paingun sa pantalan sa Bancal.
Tu-ud man, samtang naglawig mi, miunos gyud sa pikas isla ug zero visibility nagyud sa pikas nga mga isla. Apan, safe ragyud mi nga nakadunggo sa Bancal Port ug nisakay napud ug bus paingun sa siyudad sa Ilo-ilo. Pasado alas 10 nami naabot sa siyudad ug nangandam nami kay sayo sa buntag ang imong biyahe pauli na sa Bacolod. Sa dili pa mupakita ang banag-banag, nibiya nami sa hotel ug nibiyahe paingun sa Ilo-ilo Port. Pag-abut sa pantalan, na-abtan pa namo ang 6:05 nga biyahe sa Ocean Jet paingun sa Bacolod, milinya dayun mi arun maka-abot pami sa shuttle bus didto sa Bacolod nga mubiyahe paingun sa among side trip sa Campuestohan Highland Resort. Sa pagtang-tang sa mooring ropes sa mga crew sa Ocean Jet ug sa hinay-hinay namo nga pagbiya pantalan, nag-anam-anam ug flashback tanan namo nga experience sa duha ka adlaw namo nga pag suroy sa Ilo-Ilo. Na-a ba koy nahabilin sa Ilo-ilo? For sure, ang labing bililhung butang nga akong nahibilin sa Ilo-Ilo mao ang ako kinasing-kasing nga pasalamat sa mga tawo nga among nahimamat sukad sa unang adlaw nga among pagtamak sa lugar hangtud sa ulahing tunob nga among gi bilin. Sa matag-tawo nga among masugatan ug mapangutan-an kung unsa ang jeep masakyan, ngadto sa kung tag pila ang plete sa jeep paingun sa Garin Farm, hangtud sa kung asa ang mga kan-an sa siyudad; sa matag bata, lalaki, babaye, lolo ug lola- tanan nga possible nga mapangutan-an andam sila nga mugiya kanimo, andam ka nilang tabangan arun ka makatul-tol sa angay nimo nga padulngan. Ug ang labing dili namo malimtan sa tanan, ang duha ka babaye nga among nakasakay sa bus gikan sa Garin Farm, bisan wala mi kaila nila ug wala sad sila nagpaila, nangutana ang usa nako ka higala kanila kung unsaon pagtultol ang Esplanade River, wala sila nagdumili sa pagtabang kanamo, ug mas labing gipasalamatan namo, mao ang ilang kamaayong tawo. Pag-abot namo sa siyudad, nipara dayun sila ug taxi unya gihatud mi nila sa entrance sa riverbank trail sa Esplanade River. Sa dihang nagpasalamat nami, ilang gitubag lang kay delikado ang pagtabok sa pikas eskina tungud sa nahitabong disgrasya sa mga niaging buwan. Wala sila kahibaw kung unsa kadakong tabang ang ilang gibuhat alang kanamo. Sa pagtagik nako nii-ning maong sinuwat, napamatud-an nako nga ha-um lang gyud ang bansagon nga ang Ilo-Ilo kay mao ang City of Love, tinu-od nga bisan sa ka-adunahan sa kultura ug komersyo sa maong Dakbayan, ang bugtong hiyas nga gihuptan niini mao ang ma-abi-abihong katawhan nga andam mu-alagad kanimo. #IloIlo #CityOfLove #Bacolod #Carles #GigantesIsland #Campuestohan #GarinFarm #MoloChurch #MoloMansion #IloIloMuseum Featured image from skyscanner.com.ph
Comments